Bjørn-Petter Tøsse (1994), trekkspelar, frå Hustadvika
Utmed kysten av Hustadvika finn vi Skotheimsvik, ei lita bygd der folk er opptekne med landbruk og fiske. Her vaks Bjørn-Petter Tøsse opp, med nok tid til å øve på trekkspelet. Den første musikkundervisninga fekk han på Fræna kulturskule, no Hustadvika kulturskule, sidan har han studert jazz, improvisasjon og bulgarsk bryllaupsmusikk ved Norges Musikkhøgskule. Bjørn-Petter har vore verda rundt med trekkspelet, på turnéar i Frankrike, bryllaupsspeling i USA og på Balkan, konkurransar i Serbia og Hellas og studieturar i India. Han har spela med band som BabaYaga, Batkakollen og Oslo Balkan Band. Første album i eige navn, “Habitus”, kom i fjor. Bjørn-Petter spela på Klangfestivalen første gong i fjor, i år høyrer vi han i ein solokonsert laurdag kl. 17:00 – eller midt i fjøstida, som nokon vil seie.

 

Dag-Filip Roaldsnes (1984), pianist, komponist, frå Valderøy
Dag-Filip fann tidleg vegen til Ungjazz i Ålesund, og vidare til jazzstudier ved Norges Musikkhøgskule. Han har jobba med musikarar som Karl Seglem, Frode Haltli, Anja Skybakmoen og Hanna Paulsberg, spela med The Margarets og Ålesund Strykekvartett, Mats Eilertsen og Kåre Nymark jr, forfattarane Nils-Øivind Haagensen og Edvard Hoem, utmerka seg med bandprosjekt, og fått kritkarros for albumtrilogien Først (2012), I eit landskap (2016) og Resonans (2020). Med musikalsk bakgrunn frå bedehus og jazz til europeisk kunstmusikk maler Dag-Filip med mange fargar i paletten. Han har spela på Klangfestivalen sidan starten i 2014, som solist, bandleiar, arrangør og komponist. I år kan vi høyre han på opninga fredag kl. 18:00 i Jorun Marie Kvernbergs Perleskum, og som leiar av Roaldsnes Fire i Hilde Brunsviks Min lille by fredag kl. 20:00, og i Karl Seglems Djup redsle. Djup ro laurdag kl. 19:00.

 

Elever frå Hustadvika kulturskule
Hustadvika kommune er ein relativt liten stad, sjølv i norsk målestokk. Likevel er kommunen heimstad til ei lang rekkje betydelege musikarar og kunstnarar. Mange av desse begynte på kulturskulen i kommunen, og kulturskulen florerer stadig meir som åra går med nye born som ynskjer å lære meir, og som brukar mykje av tida si på øving. Fleire av dei vaksne musikarane på Klangfestivalen i år starta òg sine musikalske reiser gjennom Hustadvika kulturskule. Elever frå kulturskulen har stått på festivalscena kvart år sidan starten i 2014. Under festivalopninga fredag kl. 18:00 får vi høyre nokre av dei som går på Hustadvika kulturskule no.

 

Ellen Brekken (1985), bassist, frå Tynset
Ellen kjem frå ein familie med mange musikantar, og vart tidleg interessert i musikk. Som 13-åring plukka ho opp onkelens Fender Precision-bass, sidan gjekk ho på musikklinja på Nord-Østerdal vidaregåande, spela i storband og symfoniorkester. Ho har musikkutdanning frå Stavanger, Norges Musikkhøgskule og Cape Town, spelar fast med namngjetne Hedvig Mollestad trio, og med Tord Gustavsen trio, Falkevik, Du og jeg og vi 2-3-4. Dei siste åra har ho starta og leia det profilerte bandet A tonic for the troops. Ellen bringer musikalsk tyngde og leiken oppfinnsomhet til alt ho gjer. Ho kjem til Klangfestivalen for andre gong og spelar to konsertar med husbandet Roaldsnes Fire – Hilde Brunsviks Min lille by fredag kl 20:00, og Karl Seglems Djup redsle. Djup ro laurdag kl 19:00.

 

Endre Ruset (1981), poet, frå Molde
Endre seier sjølv at han tenkjer på skriving som ein leikeplass og ein meditasjon. Han har oppvekst og skulegang frå Molde, gjekk på Buskerud folkehøgskule, Skrivekunstakademiet i Hordaland og Universitetet i Bergen. Han har vore involvert i Bjørnsonfestivalen sida 1992, dei første åra som frivillig. Sidan forfattardebuten i 2001 med diktsamlinga Ribbeinas vingespenn har han publisert dikt, fått Bjørnson-stipend, leia Norsk Litteraturfestival (2009 til 2011) og hausta kritikarros for nyskapande språk og personlege sansingar. Siste diktsamling, Deretter, kom i fjor. Endre kjem til Klangfestivalen for andre gong, i år opnar han festivalen med nyskriven prolog fredag kl 18:00.

 

Gunn Sissel Bakken Håseth (1967), kantor, dirigent, frå Kvernes
Dersom du har vore på gudsteneste eller bryllaup i Vågøy eller Myrbostad kyrkje, er sannsynet høgt for at du har fått høyre Gunn Sissel Bakken Håseth sitt orgelspel. Gunn Sissel er kantor i Hustadvika kyrkjelege fellesråd og har utdanninga si frå Musikkonservatoriet i Trondheim. Ho er fast dirigent for festivalen sitt kor, Klangkoret, og i år høyrer vi henne på  salmekonserten Så still er denne vakre morgonstund søndag kl 12:00, saman med Knut Anders Vestad, Randi Anita Dale og publikum.

 

Hilde Brunsvik (1959), songar, forfattar, låtskrivar, frå Moss
Hilde syng eigne og andres songar, i eit musikalsk vegkryss der jazz møter viser, soul og blues. Ho er utdanna idehistorikar frå Universitet i Oslo og songar frå Complete Vocal Institute i København. Ho debuterte som forfattar i 1989 og har publisert noveller, romanar og ein biografi om jazzpianisten Einar «Pastor’n» Iversen. I 2019 kom første, andre og tredje plate: Run For Love II, med eigne songar, Edvard Hoems LIVET i samarbeid med Edvard Hoem og Dag-Filip Roaldsnes, og en samling jazzstandardlåtar med tittel Maybe Next Year. Siste roman, Kamma/Emma, kom i fjor. Hilde er Klangfestivalens grunnleggar, sjef og bakkemannskap. I år høyrer vi henne fredag kl 20:00 i konserten Min lille by med Roaldsnes Fire og Karl Seglem.

 

Jorun Marie Kvernberg (1979), folkemusikar, frå Elnesvågen
Hustadvika er heimstaden til fleire gode musikarar, mange av desse starta med instrumenttimar ved Hustadvika kulturskule. Ein av desse er Jorun Marie Kvernberg. Jorun Marie studerte folkemusikk på Norges Musikkhøgskule, og har sidan arbeidd som  folkemusikar og komponist, i solokonsertar og med ein lang rekke ensemble som Kviven duo med Britt Pernille Frøholm, duo med Gabriel Fliflet, Tindra trio med Åshild Vetrhus og Irene Tillung, og bandet Majorstuen. Jorun Marie har spela på Klangfestivalen fleire gonger, i år opnar ho festivalen fredag kl 18:00 med konserten Perleskum med Dag-Filip Roaldsnes, Unni Boksasp og Lars Andreas Haug, musikk av Jorun Marie og tekstar av Aasmund Olavsson Vinje.

 

Karl Seglem (1961), saksofonist, bukkehornspelar, poet, komponist, frå Årdalstangen
Karl fekk ein saksofon på ein korpsøving, med greptabell og beskjed om å gå heim og finne ut korleis han laga lyd i dette instrumentet. Det fant han ut, sidan har han skapt eit særeige musikalsk landskap med impulsar frå frijazz, nordiske folketonar og noko som renn i djupet og kanskje ikkje har noko namn. Han gjekk på musikklinja på Voss Folkehøgskule, og drog på sin første turné for Rikskonsertane med ein av dei andre elevane, no avdøyde Kenneth Sivertsen, i 1985. Musikken har sidan teke han til samarbeid med ein lang rekke musikarar, som Håkon Høgemo, Andreas Ulvo, Kåre Opheim, Arve Henriksen, Berit Opheim, Terje Isungset, Jon Eberson, Elin Rosseland, Daniel Herskedal, og forfattar Jon Fosse. Han platedebuterte i 1983 med Kenneth Sivertsen, og har ein lang og kritikarrost platekatalog, i eige namn og i ulike samarbeid. I 1991 starta han plateselskapet NORCD og har markert seg som ein uredd og kompromisslaus utgjevar. Karl har spela på dei fleste norske festival- og konsertscenene, og ei lang rekke konsertar rundt omkring i verda. Dei seinare åra har han også markert seg som poet og barnebokforfattar. Karl har spela regelmessig på Klangfestivalen sidan starten i 2014, i år høyrer vi han i Hilde Brunsviks Min lille by fredag kl 20:00, og i sin eigen konsert Djup redsle. Djup ro laurdag kl 19:00.

 

KINDA Trio
KINDA Trio er Jasmina Zivic på fløyte, Anna Ostachowska på bratsj/fiolin og Zhala Aliyeva på cello. Trioen har base i Kristiansund, der dei tre medlemmane arbeider i Operaen i Kristiansund, og røter i Serbia, Aserbajdsjan og Polen. Med stor formidlingsevne og mykje liv og leik har dei dei siste fire åra spela konsertar på festivalar som Festspillene i Kristiansund og Festspela i Geiranger, og ein serie barneforestillingar i Tingvoll, Molde og Tresfjord. KINDA Trio har nokre av føtene i klassisk musikk, og nokre i folkemusikk frå ulike kantar av Europa. Dei kjem til Klangfestivalen for første gong og spelar konsert for barn i alderen 2 til 102 på  Hoem grendahus laurdag kl. 15:00.

 

Klangkoret
Klangkoret er lokale og litt mindre lokale songarar som til vanleg syng i nokre av dei mange dyktige amatørkora i regionen. Klangkoret har gjeve stemmer, fargar og liv til konsertar og konsertgudstenester sidan festivalstart i 2014. Koret blir leia av Vågøy kyrkjes eigen kantor Gunn Sissel Bakken Håseth, og kan høyrast på salmekonserten Så still er denne vakre morgonstund søndag kl 12:00, med Knut Anders Vestad, Randi Anita Dale og publikum.

 

Knut Anders Vestad (1969), organist, komponist, frå Aureosen
Knut Anders begynte si musikalske reise med orgelmusikk i Vågøy kyrkje og undervisning ved Hustadvika kulturskule. Han er utdanna organist og komponist frå Trøndelag Musikkonservatorium og er ansatt ved Institutt for musikk på NTNU. Han har skrive verk til Nidarosdomens Guttekor, Hamsundagane, Trondheim Jazzfestival og Molde domkyrkje. Med Edvard Hoem skreiv han barneoperaen Fiskaren Rasmus og felemusikken til Vågøy kyrkjes 100-årsjubileum i 2004, og to operaer til Den Norske Opera & Ballett. Knut Anders har samarbeid med artistar som Ole Paus, Moddi, Jonas Alaska, Katzenjammer, Knut Reiersrud og Henning Sommerro, og har skrive kammermusikk, teatermusikk og musikalar. Han er òg grunnleggar og mangeårig leiar for Kibnebfestivalen. Knut Anders har spela på Klangfestivalen fleire gonger, i år leiar han salmekonserten Så still er denne vakre morgonstund søndag kl. 12:00, med Randi Anita Dale, Gunn Sissel Bakken Håseth, Klangkoret og publikum.

 

Lars Andreas Haug (1975), tubaist, komponist, frå Frogner i Sørum
Lars Andreas starta som tubaist i Frogner skulekorps på 1980-tallet, og har sidan halde fram med å bruke tubaen som jazzar og solist i mange ulike band og konstellasjonar over heile verda. Han studerte på Norges Musikkhøgskule (1994-2001), platedebuterte med albumet Tu´ba med Live Maria Roggen i 1998, og har sidan vore med på ei rekke innspelingar. Han har fire album med Lars Andreas Haug band: Vinterfjøs (2005), Fabatune (2008), Conrairo (2013) og Wazairo (2019). Han vann ein Spellemannpris med Ragnhild Furebottens Never on a Sunday i 2011. I tillegg har han vore aktiv med Tri O´Trang, Moments Notice, SOT og Trygve Seim Ensemble, for å nemne nokre. I dei siste åra har han gjort ei rekke konsertar med Camilla Susann Haug i duoen Messing with voice. Lars Andreas er òg ein anerkjend komponist og har blant anna skreve musikk brukt i samband med Berlin Konzerthaus sitt 200-års jubileum. Han er medprodusent i plateselskapet Glacier Records, der han har gitt ut mykje av musikken sin dei siste 10 åra. Lars Andreas kjem til Klangfestivalen for første gong, vi høyrer han fredag kl 18:00 i opningskonserten Perleskum med Jorun Marie Kvernberg, Dag-Filip Roaldsnes og Unni Boksasp, og laurdag kl 19:00 i Karl Seglems Djup redsle. Djup ro.

 

Miriam Venås Trio
Moldebaserte Miriam Venås Trio er songar Miriam Venås, pianist Dagfinn Grønvik og gitarist/bassist William Stavik. Miriam har lang fartstid som artist, kordirigent og pedagog, og har gjennom åra sunge med mange store nasjonale navn. Dei siste åra har ho satsa meir på eige namn og eigen musikk, i konsertar og innspelingar. Trioen har spela saman i nokre år, og har utvikla eit nært og særprega utrykk, og eit repertoar til refleksjon og ettertanke, som strekk seg frå Miriam sin eigen katalog til kjente salmar, jazzlåtar, viser og gospellåtar, gjerne i ny drakt. Miriam Venås Trio kjem til Klangfestivalen for første gong, og avsluttar festivalen søndag kl 14:00.

 

Randi Anita Dale (1982), kornettist, frå Elnesvågen
Randi Anita starta si musikarkarriere i skulekorpset i Elnesvågen, i Fræna Musikkorps og Molde Brassband. Ho studerte kornett på University of Salford i England, og spela i fleire år i eit av Englands mest berømde brassband, Foden Band, på konsertar og turnear i hele Europa. Etter åtte år i England kom ho heim til Fræna og jobben som kulturskulerektor på Tingvoll, før ho i 2017 vart kulturskulerektor i dåverende Fræna kommune. Randi Anita har ein finger med i mykje av det som skjer av kulturelle aktivitetar i Hustadvika, og er òg aktiv som musikar og dirigent i regionen. Ho har spela på Klangfestivalen og med Klangturnéen fleire gonger, i år høyrer vi henne i salmekonserten Så still er denne vakre morgonstund søndag kl 12:00, med Knut Anders Vestad, Gunn Sissel Bakken Håseth, Klangkoret og publikum.

 

Tore Sandbakken (1985), perkusjonist, komponist, produsent, frå Trondheim
Tores første musikalske kjærleik var Steely Dan og The Beatles, før han fann vegen til jazzen og den improviserte musikken. Han har utdanning frå Norges Musikkhøgskule og Rytmisk Musikkonservatorium i København, og er ein allsidig og etterspurd perkusjonist med konsertar i Norge, Europa, Japan og USA, med band som Mapping Oceans, Dag-Filip Roaldsnes Ensemble, Odd Steinar Albrigtsen Quintet, Speakeasy, Aphrodisiac og Bergljot. Han har spela med musikarar som Jens Carelius, Jan Vardøen, Nils Petter Molvær, Arrigo Cappelletti, Kristoffer Kompen og Stein Bull-Hansen. I 2009 vart han Spellemann-nominert for albumet Kayak. Han er etterspurd som plateprodusent og studiomusikar og har bidratt på ei lang rekke innspelingar. Han er óg produsent for Jazzfest Trondheim og Midtnorsk Jazzsenter. Tore har vore Klangfestivalens faste trommeslagar sidan starten i 2014, i år høyrer vi han i husbandet Roaldsnes Fire, i Hilde Brunsviks Min lille by fredag kl 20:00, og Karl Seglems Djup redsle. Djup ro, laurdag kl 19:00.

 

Unni Boksasp (1972), songar, frå Tingvoll
Møre og Romsdal er ein liten stad i den store verdssamanhengen, eit vêrhardt og ulendt terreng som er heimstaden til overraskande mange musikarar i verdsklasse. Unni Boksasp er ein av desse. Med stemma si har ho vunne Landskappleiken to gonger, motteke Spellemannprisen for folkemusikk og Folkelarmprisen for tradisjonelt samspel, og ho har gitt ut mykje tradisjonsmusikk. Unni  har òg mot til å gå uvante vegar, og i mykje av musikken hennar kan vi høyre ein utforskande søken etter noko nytt, samstundes som ho tek vare på den tradisjonelle folkesongen. Unni kjem til Klangfestivalen for første gong, vi høyrer henne i opningskonserten Perleskum fredag kl 18:00, med Jorun Marie Kvernberg, Dag-Filip Roaldsnes og Lars Andreas Haug.

 

Vegard Hasselgård (1983), gitarist, komponist, frå Fredrikstad
Vegards første musikalske kjærleik var Vazelina Bilopphøggers og Knutsen og Ludvigsen i barneåra, Aerosmith og Michael Jackson i ungdomsåra, og foreldras LP-samling av jazzplater. Farens gitar vart henta ned frå veggen på eit tidleg tidspunkt, vegen gjekk til musikklinja på Greåker vgs, og vidare til jazzstudiar på Norges Musikkhøgskule med legendariske Jon Eberson som gitarlærar. Vegard arbeider som frilans musikar i ulike prosjekt, som albumane til Kjetil Flatland og IAmSound. To studioinnspelingar frå i sommar ligg på beddingen, den eine med Dag-Filip Roaldsnes. Vegard kjem til Klangfestivalen for første gong, vi høyrer han fredag kl 20:00 i Hilde Brunsviks Min lille by, og laurdag kl 19:00 i Karl Seglems Djup redsle. Djup ro.